تدري وش اصعب شي ( مفارق الشي )
اللي يعينك على الحياة ومللها

اللي إذا أضميت لاحقك بالـريّ
وأطفى لهيب خافقي من عللها

شخصٍ يسوح الحب مايتركه نيّ
يشعل شموعك مايدور بدلها

ولو زدت به حرقى ونيران مع كيّ
رآقه .. وحزنك في المعاليق تلّها

ولو جارت الدنيا وحطتك بالغيّ
يشطب على جرحك وقربك دولها

شخصٍ ملك قلبك ولا فيه من زي
ذا اللي شرايينك بقلبك يدلها

ماغيره بنفس العنى جاوز الخيّ
والعم والاب .. وبقايا أهلها

ياطير قله غيبته قد طوت طي
ليلي مع صبحي وزهرة أملها

قلّه شروق الشمس مايتبعه ضيّ
إلا إذا ردت كما في أصلها

وقلّه فلا ظلٍ من الحزن ولا فيّ
أقدر اتجنب به وفاتي ولجلها

قلّه حبيبك أصبح بمسرحك شي
آخر فصول الحب بيدك سدلها

وتدري وش اصعب شي لمفارق الحي
إنك تعيش بدنيته ومن بلها ..!