على حد العطش ارسم فمي غيمة وخمس اطفال ،
ــــ على حد الظلام اشعل يدي عصفورتين وشمس .
مكاني هو مكــــاني والزمان يشوفني أشكال ،
ــــ اجي مره صراخ أقوى من الحكمــــــــة ومرة همس .
انا كرهي خبال ولا عشقت اعشق بعد بخبال ..
ــــ ولا اعرف الوسط بين الحلول وذي طبيعة نفس ..
وانا عشقي لباكر لجل اذا بركض رفيق ظلال ،
ــــ وفي زوادتي تمر النخيل اللي زرعني امس !
معي في الذاكره بنت توصيني بمشط وشال ،
ــــ وصوت امي يوصيني .. لاتجي ربعك بخاطر عمس ،
وانا امك لا تنام في ليلة وانته خلي البال ..
ــــ وخل ادنى طموحك لانظرت لنجمتين اللمس !
وانا امك لا صعدت اصعد مثل دعوة فقير الحال ،
ــــ ولا منك نزلت انزل مثل غيث بيحيي غرس .
وعلى حد العطش ارسم فمك غيمة وخمس اطفال ،
ــــ وعلى حد الظلام اشعل يدك عصفورتين وشمس ..

فهد عافت ‏،