1
قبل كم يُوم , كنت مع بابا في البحر , كان الفجر , ودخلت البحر وسبحت , وحسيت نفسي صغيرة جداً , ولما جا طائر النورس , تأملته , وناديت بابا الي سبقني وراح هنااك عند الموجة الكبيرة ! , ومشيت بالبحر كان الموج خفيف لين وصلت عنده , قلت له شفت النورس الي من شوي طار صوبنا ؟ قال لي ايه .. قلت له خاطري أكون نورس ! لو كنت نورس , كانت أحلامي تتحقق أسرع وأسهل ! ..
2 قبل كم يوم رحت مع بابا المسجد أصلي , أحب صلاة الجماعة , لأنها هادئة جداً , ولأنّ في المسجد ما يجيني الشيطان بالصلاة كثر لما أكون بالبيت .. ( أحس الجملة مكتُوبة بالهندي , مو مشكلة ) بعد الصلاة رحت بيت عمّي , عمّي الي يذكرني بطفُولتي لأنّه كان يجي كل يوم الصباح وياخذني ونروح أنا وبنت عمي للمدرسة مع بعض , كان يشغل اذاعة القرآن الصباح , وما يخلينا نسمع لأن باختصار يشغلها ويقرأ مع المذيع , وكانت بنت عمي ( تتحلطم ) , وأنا أقول لها سكتي هذا أبوش 
.. 3 المُهم لما رحت بيتهُم قعدت معاها , وصار لنا شهر ونص تقريبا ما قعدنا وسولفنا , وبين السوالف والحكيات , بدأت تحكي لي عن قصصها مع المسن , وشلون زوجة عمي تزعجها بين الحين والآخر , وكانت تقول تجي تتطفل علي وانا قاعدة ع المسن , جان أعطيها ( طراق ) , عشان تتسنع وتتكلم زين عن أمها 
.. 4
أبد أبد , ما تقدر تسكت , الي في قلبها ع لسانها .. عاد في النهاية تقول لي محمدوو المصرقع ( هذا نملة عمره 10 سنوات تقريباً , مصرقع جداً , تووحفة هالانسان لازم اخززه لما اشوفه , ولازم يتمسخر على حركاتي أياً كان نوعها , أذكر جا البيت من قبل كم اسبوع وكنت وقتها حافظة قصيدة جديدة , وكل شوي أقول بيت منها وألحن على كيفي , مرة لحن ومرة شعر , المُهم تنرفز مني , ما اشوفه الا جاي لي يقوول , بس عاااد تكفين خلااص درينا , قسم بالله درينا هه ) .. : (
المُهم نرجع للسالفة الأصلية , تقول لي انّ محمدو يجي يتليقف أحياناً لما أكون ع المسن , عاد قبل يومين يقول لي , ساروو بنت عمّي حفظناها , لما نشوف صورة جناح حمامة , والا عصفور طاير بالسما , والا بجعة بيضااا معنااه هذي ساارة !! , 
مدري شحسيت ذاك الوقت ... المُهم انّي حسيت بشي وبقيت أضحك ! 5 رايحة أشوف أمّي بقوم أشتري كرت وكم شغلة ثانية , عندي زحمة اتصالات .. ويارب افتحها علينا , أول مرة في حياتي أحاول علشان شي هالمحاولات كلها , أحسها بجد مقفولة من كل صُوب .. بجد بجد صعبة , ومرهقة , ومقفلة , يا أنا يا هالحلم .. 6 على طاري الحلم .. كلما رحت أكلم أبوي عن شي ( شبه مستحيل ) .. قلت له اسمعني يا بابا .. اليُوم أبتكلم معاك في موضوع مُهم .. ولما أبدأ الموضُوع .. دائما تكون الافتتاحية .. [ بابا هذا حلمي .. ] .. ترى هالكلمة لها سر عجيب .. يخلي الراس يلين شوي .. وتهدئ المخ .. وتساعد على الثقة والقوة في الكلام لاقناع الطرف الآخر والعالم كله .. [ اسألو مجرب ] .. 7 وكل يُوم والثاني طالعة بحلم جديد .. المرة الي فاتت يقُول لي بابا , [ سااااارة , انتين دايما هذا حلمي !؟ ] .. , اعترف انّي خجلت على خفيف .. بس يالا هذا حلمي !! :$ 8 أمي تقول , انّي لما أكتب بالعامي , أكون طفلة صغيرة - تتعلم تكتب تعبير - , وأبداً مو كأنّي أنا , ويراودني نفس الاحساس .. عادي أصلاً .. [ في أشياء هي تنكتب من نفسها بالعامي (اختراع هاا ) ] .. : )
صعبة الحياة : )