ابأكتـب للكتابـة شـي يدفعنـي
ابأكتبني/أرتبـنـي وأمـحـانـي
وآصلني برحـم الليـل وأقطعنـي
واغنيّني كثر ما الحـزن غنّانـي
مشيت وما سوى هالشعر يتبعنـي
وقفت وما سوى هالعقـل ينهانـي
صرخت وما سوى هالليل يسمعني
كتبت وما سوى هالحزن يقرانـي
أغيب وفي غيابـي شـي يقنعنـي
أجـي وبجيّتـي أشيـاء تشنانـي
أحسّ ان الحضور/النور يفزعنـي
عصافيري تطير وتهجر اغصانـي
واحسّ ان ابتعادي شـي يمتعنـي
يصالحني على عقلـي ووجدانـي
يحررني من اشعـاري ويرفعنـي
عن الركض/التواجد كل ما اغواني
أنا الانسان كيف الشعر يصنعني.؟
أنا الرجّال كيف اعيش بلسانـي.؟
أنا الانسان هذا الشعر مـا يعنـي
سوى جملة أحاسيسي وأشجانـي
يخوفني الشعور اللـي يشجعنـي
الى منّي وصلـت هنـاك خلاّنـي
أخاف القى شهد شعري واضيّعنـي
والقى مجد أشعـاري ولا القانـي
واخاف أكبر على نفسي ولا آسعني
ولا ترضينـي اشيائـي وخلانـي
ويغويني هـوى نفـسٍ توزّعنـي
الى أجـزاء كـلٍ يشتـم الثانـي
ويستصلحني القارىء ويزرعنـي
ويحصد من محاصيلـي وينسانـي
تبعثرنـي قناعاتـه وتجمعـنـي
ورأيه بـي فضاءاتـي وسجّانـي
أخاف أبعد بعيـد ومـن يرجّعنـي
الـى ذاتي/بساطاتـي وأحـزانـي
أخاف القى جماهيـري واضيّعنـي
وألقى الناس فالآخـر ولاألقانـي

لل فريد " تركي الرويع "