.
عساك بخير يازولٍ صدفني فالطريق عصير
بعد طول البطا شفته وانا للشوف توّاقي
عساك بخير والنظره تفوح من الغلا تقدير
شذاها من قديم الوقت واحيت ذابل اشواقي
تغانمت الوصل شفقان لايامٍ لها تأثير
بقت في صفحة الذكري تعيش بوسط خفّاقي
حبيبي وان كبر جرح الغرام وبان بك تقصير
تبى تبقى حبيبي والرجا في عودتك باقي
قسم بالله ما غابت طيوفك عن سما التفكير
ولكن غابت الفرحه وخابت هقوة الهاقي
اصبر نفسي بفقدك بعد ماذيّرت تذيير
واقول انك ولهت لشوفتي واشتقت لعناقي
واناظر للزمن يمكن اشوف لغيبتك تبرير
وتاقف شرهتي خجلا بعد ماكلّت احداقي
وقف عمر الفرح بعدك ولا ادري وش بعد بيصير
رجيتك لاتموّت ضحكتي في قصّة فراقي
انا اللي سمني هجرك وكدّر خاطري تكدير
وانا اللي من نهار البعد حزني يسكن اعماقي
عساك بخير من صدق المشاعر قلتها يا طير
تمنّيتك علي غصن اللقا واكشفلك اوراقي
سعد الرويس