{الغياب وهآب}

الغياب..
يلبِّّسْ من تحبّ ثياب..
من وَرْد.!
والوَجْد ..!
يعطي الذكريات اليابسـ ه..
نبْض ومشاعر..
.. يكسي جفاف احزانك الصفرا ..
ملامح ..
من ندى واعشاب!
الغياب
مجنون.. يرسم ...
للشبابيك الضّريره..
عيون خضرا..
تخلّي شوك البعد ورده..
والحصى ..لبلاب!
الغياب لو تدري يفتح..
للخيال ابواب
يعيد تشكيل الصور
ويجمِّلْ الأحباب
والحبيب اللي تحبّـ ه
مهو نَفْس ذاك الحبيب
لوغاب..!
فـ الغياب ..
الحبيب يصير أَجمل
الحبيب يصير أشهى
وماتشوف في من تحب
غير ماتحب
والخطايا..
تصير هدايا..ترتجيها
ويورق الغفران عندك..
من سراب عْتاب!
فـ الغياب..
الحبيب يصير أعذب
الحبيب يصير أقرب
يمتلي بوجهـ ه مساك
تمتلي بنوره سماك
يمتلي بأسمـ ه نِداك
يصير كلِّك
وكل شي له يوديك ويدلّك..
تحسّْ كِنّـ ه..
ساكن فـ أوضح مراياك..
وفي ظلك!
وبلحظـ ه ماتدري وش اللي..
شجّر ايدين المدى..
عِنّــاب!!
لا ولاتدري وش اللي..
حنّنْ الفرقا عليك
رقّت وخلّت حبيبك ..
في ظماك ينساب؟!
لا ولاتدري وش اللي..
يخلّي شوقك..
دوم يفتش..
في حقايب الوصال
ويسأل بلهفـ ه عن اللي..
من عند الحبيب .. لك جاب!!
وتسأله لو كان يقدر
ياخذ شويـ ة هدايا للي غايب:
بعض اغاني..
تطرد الوحشه في صدره
وشال دافي للشتا
وشمس لليل الطويل
وسقف يحميـ ه ومظلـ ه..
حتى لايبتلّ شَعْره
لاهمى حزن البعاد..
والوجوه أغراب.
وياخذ لخيمـ ة رجاه..
من رجاك..أَطناب!
الغياب..
يشفِّف القلب ويسرِّج..
فـ الحنايا.. شْهاب!
ياحبيبي..
غِيْب لو ودّك تغيب
فـ الغياب..
تصير "فيني" حاضر أكثر!
وقلبي رغم البعد يقدر
يوصلك من ألف سكّـ ه..
ويدخلك من ألف باب!!
الغياب..وهَّاب!

* مسفر الدوسريْ .