نَفْسُكَ كُرةُ صوفٍ فَهْلْ أَحصَيْتَ خُيوطَها ؟

1- بصعوبة أعبر عن مشاعري أياً كان مكنونها !!
2- ماتحمّل أحّد يوجه لي نصيحه أو يأنبني ع شي أو يزفني أو حتى يتودد لي بكلمة من ( أهلي - أقاربي ) دمعتي قريبه بشكل بايخ! - لدرجة لو كان الموقف معاتبه و كان الحق معاي يصير الحق علي لأني ابجي بخبال لدرجة اللي جدامي ياخذ بكائي حجّة علي واحساس بالذنب - إلا إذا و انا ابجي اصارخ و اتكلم لـ درجة تحسس اللي جدامي اني شرانيه !
3- أصير لبوة شرسه لو غلط أحد ع امي أو خواتي أحيان كثيرة أصير أم لأمي و خواتي ، ممكن آتخلى عن برستيجي و عقليتي و هيبتي كرمال آخذ حقهم!
4- " نفيسَه " جداً ، يعني عادي أكون متحمسه أكثر شششي لطلعة خارجية و بس يعكّر مزاجي [ شخص / شي ] أقول ماني رايحه! و عادي جداً أعننند و احط راسي وانام ! - ما تحمل نرفزه رغم اني كنت صبوره - كنت
5- صارت عندي مناعة من العتب - ما اعاتب و لا أسأل الرايح وين رايح ؟ - متبلده و لله الحمد و تعديت مرحلة أشتري خواطر خلق الله صرت اشتري راحة دماغي !
6- أمل بسرعه ! من تصميم موراضي يكتمل! معنّد لا يضبط ! من دراسة جابتر! من دراسة ماده! من بحث!
7- عيووووزه - و ما احب اكتب اس ام اس الفون و اكره رسايل السوالف الرايح راد! تنرفزني!
8- صراحتي تسبق مجاملتي دااايم - أحيان بعد ما اتكلم و اخلص اندم اني توسعت بصراحتي - لكن عزاي الوحيد اني ما تصنعتها ! تطلع بروحها !
9- ماعرف أعتذر! مو لأني مابي بالعكس أسعى لو كنت فعلاً استاهل أقوم بهالشي بس ماعرف! ممكن أقعد أضحك ضحكة عاااالية [ ضحكة المفتشل] بوجه الطرف الثاني! أو أسوي حركات بفيسي! أو أطينها زياده!
10- ماعرف أسايس الشخص اللي حاجتي عنده أبببداااً ، حتى دكاترتي لو أبي حقي بقريد هووم وورك أو كورس ماعرف اساحلهم على طول يا يقول إي يا يقول لا رغم إنو لو فاصلته باخذ اللي أبيه و فوقة زياده !

11- العلاقات الاجتماعية مشكلتي الأزلية ، فاشلة ب تكوينها من تلقاء نفسي ، دايم أنطر مبادرة الطرف الثاني! فكرة إن هل ممكن يتقبلني أو لأ تسبب لي أزمة بمخي وقلبي! يعني قبل آسلم مثلاً أو أسأل أو أو يسبقني بمخي بإشارات وايده ( هل هالشخص بيرد برحابة - هل بيكشر - هل هل هل هل ) ، حتى لو أشوف شخص مثلاً على علاقة سابقة معاه صدفة بمكان ما أسلّم وأسوي نفسي ماشفت مو كِبِر و لا خجل احساس له دفنشن ماله اكسبرشن! أهون عندي هو ينتبه لي و لا أنا! - لو زميله مثلا قبل شوي بكلاس تستفسر و نسولف بنقطة و شفتها بالكوفي آسوي جني ماااشفت! مادري هذي الحالة شنو اسمها / وصفها! بس من عمر لصيقة فيني مو شي يديد تصنعته ع كبر!

12- أكتفي بالأرقام الصغيرة فحياتي! ماحب التكديس! بدءاً من صداقاتي اللي ماتتعدى أصابع اليد الوحده! وحبذا تكون اليمين! مروراً بأتفة و أكبر المواقف بحياتي ، لو رحت آشتري كتب لو اشوف إمية كتاب خاطري فيهم و ناويه عليهم من زمان آخذ أقل عدد ممكن يمليه عليه مزاجي حزتها تقريبا مسألة نسبية بس الأكيد أنهم يوصلون للثلث! ماقول إني قنوعة! بس نفسي تحب الاشياء الصغيرة اللي سهلة جدا أقبض عليها بإيد وحده و أهضمها بسهولة / باكتفاء! ماحب اتوسع ب اشيا وايد تسبب لي ربكة منو اختار أوّل منو اسمع أوّل منو ألبسه أوّل منو أراضي أوّل هالصديقة و إلا هالصديقة خاصة لو كانت صداقاتي مشربكة!
13- ماعرف اعيش من غير أمي ، موشي يديد آدري وشعور عادي وتعبير مستهلك! بس أنا أحس هالاحتياج عضال! ما اقدر آزور مكان بدونها ماعرف أسيّر ع ناس غرب أو قرب و هي مو معاي! مجرد بس آدخل الليوان و آقط عباتي و اتعطر وهي مو ع يميني تبدا الدموع تتجمّع ببلعومي! ماعرف آروح سوق بدونها! رغم أنّه أذواقنا مو متشابهه بس لو شنو ماعرف اختار شي بدون شورها يكفي تصير معاي وبس! حتى بدخولي الجامعة إهيا دخلت بدالي كنترول التسجيل و حطت لي ترتيب رغباتي! دايم أقولها تربيتج لي كانت غلط حيل علقتيني فيج! ماقدر أتحرك الا وانتي معاي! ماعرف اروح طبيب الا وانتي معاي ماعرف اروح سوق الا وانتي معاي ماعرف اسير ع ناس الا وانتي معاي! ماعرف اتكلم الا و عينج تطمني! ماكنتي تخليني اطلع بروحي من صغري مع رفيجاتي مع خالاتي و يوم بديتي تسمحين لي ع كبر صرت من نفسي ارفض اذا انتي مومعاي! تعلقي هالكثر فيج غلط!
غيابها يفززني من نومي كل سنة تحج تبارك الرحمن و كل سنة لما يقرب موسم الحج مناااحة لين ترد! لما تسافر سفريات بروحها روحي تتم معلقة لين ترد! برب دمعتين :/

اقتباس:

المشاركة الأصلية كتبت بواسطة نَفسي ، 13- ماعرف اعيش من غير أمي ، موشي يديد آدري وشعور عادي وتعبير مستهلك! بس أنا أحس هالاحتياج عضال! ما اقدر آزور مكان بدونها ماعرف أسيّر ع ناس غرب أو قرب و هي مو معاي! مجرد بس آدخل الليوان و آقط عباتي و اتعطر وهي مو ع يميني تبدا الدموع تتجمّع ببلعومي! ماعرف آروح سوق بدونها! رغم أنّه أذواقنا مو متشابهه بس لو شنو ماعرف اختار شي بدون شورها يكفي تصير معاي وبس! حتى بدخولي الجامعة إهيا دخلت بدالي كنترول التسجيل و حطت لي ترتيب رغباتي! دايم أقولها تربيتج لي كانت غلط حيل علقتيني فيج! ماقدر أتحرك الا وانتي معاي! ماعرف اروح طبيب الا وانتي معاي ماعرف اروح سوق الا وانتي معاي ماعرف اسير ع ناس الا وانتي معاي! ماعرف اتكلم الا و عينج تطمني! ماكنتي تخليني اطلع بروحي من صغري مع رفيجاتي مع خالاتي و يوم بديتي تسمحين لي ع كبر صرت من نفسي ارفض اذا انتي مومعاي! تعلقي هالكثر فيج غلط! غيابها يفززني من نومي كل سنة تحج تبارك الرحمن و كل سنة لما يقرب موسم الحج مناااحة لين ترد! لما تسافر سفريات بروحها روحي تتم معلقة لين ترد! برب دمعتين :/

14- دام ذكرنا الوالده وفاءً بذكر أربعيني منوّرلي حياتي ، أعظم رجل بحياتي و أحلى دهن عود شميته كان ع رقبته و كتفه و راحة يدينه ، أحبه حيل رغم أنّ هالحب محسوس مو ملموس! أوّل من أثرت رجولته ب حروف " بابا " ، نادوه ب اسمي فترة ، أوّل ياهل يقرى عليه كل ليلة إلى الآن! أوّل طفل بحياته يحفظه المعوذات والكرسي ودعاء المكان! أوّل ابنة فحياته تشرفه بامتيازاتها! كنت أوّل بيبي فحياته داعبه و أذّن ب أذونه ، أوّل بيبي خذاله بامبرز و لف فيه جمعية الشامية ، أوّل مراهقة طبق عليها كتب المطوع و الثويني هههه ، أوّل بيبي يلف المثنى لفففف عشان يدورله جنطة طبيّة للمدرسة ، أوّل بيبي يصمم له شوز خاص طبي للابتدائية و يخاف ع أكبر و أغور شي ف جسده ، أوّل صبيّه يدورلها ساعة رقمية تسهل عليها قراية الساعة!
ع كثر حبنا ع كثر ما هالحب راكد من فترة!
أذواقنا تتشاااابه! بالعطور بالساعات باللبس! بالأكل أحيان! بالطبايع بالعناد بالثقة اللي ماتُعطى بسهولة! بالتردد بالاستخارة مليون مره! بلوم النّفس! بالزعل مدة طويلة! بقسوة القلب أحيان اللي ترضخ ب أتفة وسيلة رضا لو كانت بوسه ع الطاير!
نتشابه وايد لكن أفكارنا متصادمه دايم!
بموديل سيارتي بتخصصي الجامعي بساعات نومي بأسلوب نقاشي بنصايحي لأخواني بعلاقاتي مع الأهل bla bla bla
من كثر ما قمت أحلل طبع الأربعيني و البون الشاسع عن مرحلة الثلاثين! لقيته يصير طفل لازم تداري خاطره ع حساب خاطر عقلك و قلبك ع حساب مودك و نفسيتك! تاخذه بقلبك و تغطيه بعيونك و إن كنت مو محتاجه لابد تحسسه بحاجتك الدايمه له و أن الدنيا متوقفه عليه وبس!
أكره شي عنده لما يحس أنّه أحد عياله فجأة استقل ماديا و عاطفيا بعيد عنه! يحس أنّه شي انتزع منه غصبا عنه! يبدا عاد يفرغ ألمه بهالشي بجفوة أحيان و أحتياج أحيان! ونظرة عتب تنقرا ما تنسمع!
صرت حريفة ب إشباع أربعينه : أتلذذ باستغبائي جدامه و أتوسله إجابة! أمر عليه يبه عندك خرده ؟ مع انه بوكي مليان! استشير ذوقه بساعاتي لبسي كل شي يحسسه أنّه للحين ذوقه كبييير و أنيييق بعيييني
أحيان ياخذني الصبح ع اساس نتريق وعندي محاضره !بداخلي ودي آقول لا ماكو وقت ! بس ادري أنه يدري بوقت محاضرتي ومع ذلك يبيني أشاركه! و إن قلبه طفل وبخاطره يشاكسني ويبتسم قلبي و أرضخ!
عزاي دايم أنّه حبي الكبير و سندي و أحَبْ ريحة رجالية بحياتي!